Қазатомөнеркәсіп қызметкері Қазақстан жас ғалымдар кеңесінің төрағасы болып сайланды

Қазатомөнеркәсіптің ғылым, сирек және сирекжер металдары департаментінің директоры Өмірғали Арманбек Қазақстан жас ғалымдар кеңесінің жаңа төрағасы болып сайланды.

Жас ғалымдар кеңесі – Қазақстан Республикасы Ғылым және жоғары білім министрлігінің жанындағы консультативтік-кеңесші орган. Кеңес жас зерттеушілердің ғылыми қызметін үйлестіруге және елдің ғылыми кадрлық әлеуетін дамытуға бағытталған. Ол жас ғалымдардың кәсіби өсуіне жағдай жасап, зерттеу инфрақұрылымын дамытуға және ғылым, білім мен өндіріс арасындағы байланысты нығайтуға ықпал етеді.

Өмірғали Арманбек – «тау-кен ісі» мамандығы бойынша PhD дәрежесінің иегері, ғылыми қауымдастықтың белсенді мүшесі, ғылыми-зерттеу және басқару саласында үлкен тәжірибеге ие. Ол Қазатомөнеркәсіпте саланың ғылыми-технологиялық шешімдерін дамытуға бағытталған бірқатар стратегиялық жобаларды қадағалайды.